Gazetarët e Reuters, të cilët vizituan dy bazat javën e kaluar, i gjetën ato pothuajse të zbrazura dhe të mbrojtura vetëm nga forcat e vogla të Forcave Demokratike Siriane (FDS), grupi ushtarak i udhëhequr nga kurdët që SHBA i mbështet prej më shumë se një dekade në luftën kundër ISIS-it. Kamerat e sigurisë në bazat e koalicionit ushtarak amerikan ishin hequr dhe tela me gjemba rrethues kishin filluar të rrëshqisnin.

Një politikan kurd që jeton në një nga bazat konfirmoi se trupat amerikane nuk ishin më aty. Njëri nga rojet e FDS në bazën tjetër po ashtu konfirmoi largimin e trupave, pa dhënë datën e saktë. Pentagoni refuzoi të komentojë.

Ky është konfirmimi i parë në terren nga gazetarët se SHBA janë larguar nga bazat e al-Wazir dhe Tel Baydar në provincën Hasakeh. Kjo i shton të paktën në katër numrin e bazave që forcat amerikane kanë braktisur në Siri që nga marrja e detyrës nga presidenti Donald Trump.

Nga 2 mijë në 500 ushtarë amerikanë në Siri

Administrata Trump njoftoi këtë muaj se do të reduktojë praninë ushtarake në Siri në vetëm një bazë, atë të Rmeilan, nga tetë baza që kishin më parë në zonat e kontrolluara nga FDS në veri-lindje të vendit. The New York Times raportoi në prill se numri i ushtarëve mund të ulet nga 2000 në 500 gjatë këtij procesi të tërheqjes.

Forcat Demokratike Siriane nuk kanë dhënë informacione për numrin aktual të trupave dhe bazave amerikane në zonë. Por komandanti i FDS, Mazloum Abdi, tha për Reuters nga baza amerikane në al-Shaddadi se prania e disa qindra ushtarëve në një bazë të vetme nuk mjafton për të ndalur kërcënimin e ISIS-it. “Kërcënimi i Shtetit Islamik është rritur dukshëm kohët e fundit. Por ky është plani ushtarak amerikan. Ne jemi informuar prej kohësh dhe punojmë me ta për të shmangur çdo dobësi dhe për të ruajtur presionin ndaj ISIS-it,” tha ai.

Abdi foli pak orë pasi Izraeli nisi sulmet ajrore kundër Iranit dhe refuzoi të komentojë ndikimin e mundshëm të këtij konflikti në Siri, duke shprehur vetëm shpresën që konflikti të mos përhapej në vend. Pak më vonë, tre raketa iraniane u drejtuan nga baza e al-Shaddadi, por u ndërprenë nga sistemet amerikane të mbrojtjes, sipas burimeve të sigurisë në FDS.

“Qeliza aktive” të ISIS në Siri

Shteti Islamik, i njohur edhe si Daesh, kontrolloi territore të mëdha në Irak dhe Siri midis 2014 dhe 2017, duke imponuar një regjim brutal dhe radikal me ekzekutime publike dhe krime të rënda kundër popullsisë civile. Nga bastionet e tyre në Raqqa dhe Mosul, ata organizuan sulme terroriste në Europë dhe Lindjen e Mesme. Koalicioni ndërkombëtar i udhëhequr nga SHBA luftoi për vite me radhë për të mposhtur grupin dhe për të marrë nën kontroll territorin.

Mazloum Abdi tha se qeliza aktive të ISIS janë tashmë aktive në disa qytete siriane, përfshirë Damaskun, dhe se luftëtarë të huaj që më parë luftuan kundër regjimit sirian i janë bashkuar grupit. Ai tha gjithashtu se ISIS ka përfituar nga kaosi pas rrëzimit të regjimit të Bashar al-Asadit për të marrë armë dhe municione nga depot ushtarake siriane.

Disa zyrtarë kurdë thanë për Reuters se anëtarë të ISIS lëvizin më lirshëm pranë bazave amerikane të braktisura, veçanërisht afër qyteteve Deir ez-Zor dhe Raqqa, dy ish-bastione të grupit ekstremist. Në zonat nën kontrollin e FDS në lindje të lumit Eufrat, ISIS ka kryer sulme të shumta, duke vrarë të paktën dhjetë luftëtarë dhe agjentë të sigurisë, sipas komandantit Abdi. Ndër to është edhe një atentat me bombë në rrugë, i cili goditi një konvoj kamionësh cisternë pranë një baze amerikane./tvklan.al